Benqueridas familias.
Como vai sendo xa costume, aproveitamos a primeira campaña do curso (o
DOMUND) para presentarvos ás familias o curso dende o equipo de pastoral do
centro.
Neste ano especial no que, como xa teredes escoitado, o noso fío condutor é
“Coida a vida, ponlle corazón”, a pastoral tamén terá que reinventarse, dado
que moitas das actividades que soemos levar a cabo, non poderán ser como
adoitaban. Así, polo menos polo de agora, non poderemos ter celebracións nin
Bos Días conxuntos, non poderá haber grandes Eucaristías nin de familias nin
por etapas, as Merendas Solidarias e as Andainas Solidarias quedan suspendidas á
espera de ver se mellora a situación, e o protocolo COVID impide que os profes
recollamos diñeiro.
Con todo, queremos seguir mantendo os compromisos solidarios, xa que
entendemos que, coma sempre, son os máis febles os que máis sofren, así
pretendemos seguir colaborando economicamente co DOMUND, queremos seguir
mantendo os APADRIÑAMENTOS, e aportando ó DOMISAL. Dando por suposto que cos
nosos rapaces e rapazas, a parte de concienciación solidaria seguiremos a
traballala a través das actividades que si seguimos a poder facer: Bos Días,
celebracións por clases, titorías... precisamos a vosa axuda nesta reinvención
para as recadacións económicas. Nós temos algunha idea, que vos iremos contando
ó longo do curso, pero estamos convencidos de que cantas máis cabezas sexamos a
pensar, mellores ideas sairán. ¿BOTÁDESNOS UNHA MAN? Polo de agora o que vos
pedimos é relativamente sinxelo: facémosvos unha pregunta, que podedes
contestar ó Esemtia da coordinadora do equipo (no destinatario marcade: Coordinación
de Pastoral) QUE INICIATIVAS PODEMOS PROPOÑER ÁS FAMILIAS PARA RECADAR
DIÑEIRO PARA APOIAR OS NOSOS COMPROMISOS SOLIDARIOS?
Para saír ó paso desta primeira campaña, o DOMUND, sumámonos directamente
ás propostas que nos achega Obras Misionales Pontificias a través do seu
representante na nosa diocese, e achegámosvos a conta de donativos para o
DOMUND, que permite tamén doazón a través de Bizum, como podedes ver na imaxe, e accedendo a través do seguinte enlace: https://domund.es/
Finalmente, e para que esteades informados do que pretendemos facer dende a
pastoral para este curso 20-21, incluímos a programación que imos seguir, coas
datas máis relevantes, as campañas e a forma na que as imos traballar.
Na programación atoparedes moitas actividades con interrogante...son as que non sabemos se poderemos levar adiante. Iremos informando das que fagamos, ou das alternativas coas que nos vaiamos adaptando a cada situación.
Se queredes coñecer máis a fondo a forma na
que a pastoral se transmite ós vosos fillos e fillas, pensamos que a mellor forma de
coñecernos é a través dos Bos Días, que colgamos para cada unha das tres etapas
neste blog de pastoral todas as semanas.
Moitas grazas de antemán polo voso apoio á pastoral do centro, e pola vosa
solidariedade con todas as iniciativas que realizamos...sabemos que esta
situación especial non vai diminuír as vosas ganas de colaborar!!!
Un saúdo virtual
pero agarimoso: Equipo de Pastoral do colexio Don Bosco.
