Pastoral

Pastoral

ESO-BBDD semana do 30 SETEMBRO ó 04 OUTUBRO



MARTES, 01 OUTUBRO 2019

Bos Días!!!!!!
Comezamos outubro centrándonos despois do arranque oficial do curso que tivemos onte coa Xornada de Orientación. E seguimos sentando as bases do que queremos vivir este curso, seguimos reflexionando entorno as actitudes que debemos ter para seguir medrando. Moitos revisamos a semana pasada a axenda, para lembrar as normas de convivencia que recolle o RRI do cole. Esta semana repasaremos algunhas actitudes de cara ós demais que poden mellorar (ou empeorar) o ambiente no cole e na aula, facilitando (ou entorpecendo) o proceso de aprendizaxe e incluso a felicidade de todas as persoas que vimos aquí todos os días.
A primeira actitude que queremos traballar esta semana é O RESPECTO: si, o respecto unha vez máis...pero é que o respecto é a base da convivencia. O día a día pódese facer duro. O curso é moi longo, e somos moitas persoas, cada quen coas súas peculiaridades. E resulta moi fácil rexeitar e apartar (incluso rir) dos que non son ou pensan coma nós. O importante é respectarnos, intentar entendernos, e traballar a empatía. Imos ver un vídeo que amosa a dous entes, en principio moi diferentes (o Día e a Noite). A ver que conclusións podemos sacar:

REFLEXIÓN: aínda que pensemos que somos como o día e a noite, temos que intentar relativizar o que nos separa, e facer un exercicio de empatía, e intentar entender os demais, porque todos queremos que nos respecten, todos temos o dereito a ser respectados, así que tamén temos a obriga de respectar ós demais. Cres que no día a día neste cole hai moitas faltas de respecto? Ti sentes que che faltan ó respecto? Cres que as faltas de respecto son conscientes (para facer dano) ou inconscientes? Que poderiamos facer para diminuír as faltas de respecto?
Palabra de Xesús: Mt 7:12: “Así que tratade á xente en todo conforme queredes que vos traten a vós, porque esta é a Lei e mais os Profetas”
Este é o clásico: “non fagas ós demais o que non queiras que che fagan a ti”. Unha curiosidade: trátase dunha Regra de Ouro da ética, e está presente da mesma forma en moitas outras relixións: xudaísmo, budismo, hinduísmo, taoísmo, confucianismo, e tamén na filosofía moderna...así que algún peso terá, non?

MÉRCORES, 02 OUTUBRO 2019

Bos Días!!!!!!
Os valores de convivencia que queremos traballar nos BBDD de hoxe son COMPAÑEIRISMO e COOPERACIÓN: Sabedes que dende hai anos o cole aposta polo traballo cooperativo. Estades sentados formando EQUIPOS de tres ou catro persoas para fomentar a cooperación entre vós. Imos ver un vídeo que, ademais de poñervos nostálxicos lembrando a vosa infancia, pretende ser unha mostra visual da importancia do traballo en equipo:


REFLEXIÓN:  que opinades do traballo en equipo? Gústavos esta forma de traballar? Que beneficios ten para os membros do grupo? Que prexuízos? Deixámosvos este tempo para que vos expresedes...pero nós estamos convencidos dos beneficios que ten a cooperación: para os que teñen máis dificultades igual é máis obvio, o compañeiro lle axuda a avanzar, pero tamén é moi beneficioso para os que van mellor, porque cando se axuda, cando se explican os conceptos, estes apréndense mellor, e podemos darnos conta de lagoas que poidamos ter. E lembrade tamén que nun equipo TODOS e TODAS somos fundamentais, todos temos capacidades especiais, algúns somos mellores nunhas cousas, e outros noutras, así que non perdas o tempo infravalorando a ninguén, mellor gáñao pescudando que podes aprender dos que tés ao redor..
ORACIÓN: Noso Pai.

XOVES, 03 OUTUBRO 2019

Bos Días!!!!!!
Seguimos coa semana da convivencia, e retomamos de certa forma o tema de onte. Falabamos do compañeirismo e a cooperación. Viamos o vídeo do Día e a Noite, porque é verdade que ás veces sentímonos así cos compañeiros, como se nós foramos o día e eles a noite. Por iso nos parece importante o exercicio de intentar achegarnos, descubrir que son máis as cousas que nos unen que as que nos separan, así que imos facer un pequeno experimento: vamos intentar facer unha lista de 8 cousas que teñamos en común cos membros do grupo no que estamos (poden ser gustos, poden ser persoas, poden ser hobbies...) as imos poñer en común, e logo intentaremos ver se podemos construír unha lista de cousas que toda a clase teña en común.

REFLEXIÓN: pareceuvos difícil? No fondo somos máis parecidos do que cremos, e o importante e intentar buscar as semellanzas, que son o que nos achegan, porque, ó fin e ó cabo, todos somos persoas, todos temos sentimentos, e todos temos dereito de que se nos respecte polo que somos. Ademais, as diferenzas non son malas, se entendemos que non teñen por que separarnos, senón que nos enriquecen.
ORACIÓN: Ave María (María, como nai de todos e todas, é unha cousa que podemos ter en común)

VENRES, 04 OUTUBRO 2019

Bos Días!!!!!!
Hoxe imos falar dos bos modais. A estas alturas todos coñecemos as normas básicas de cortesía e educación...aínda que non sempre as poñamos en práctica. O poder do POR FAVOR e o GRAZAS debemos lembralo sempre. Pero o que hoxe queremos facer é recordar a importancia que teñen na convivencia: os bos modais son importantes para manter unha boa convivencia con quen nos rodea. “É conceder importancia aos demais e recibir a súa atención a cambio.” ... Os bos modais tamén nos axudan a atopar o noso sitio e establecer contacto cos compañeiros con maior facilidade. E hoxe traemos ós BBDD a celebración dun día mundial, o primeiro venres de outubro está establecido dende 1999 como día mundial do sorriso. Foi proposto por Harvey Ball, artista comercial e creador do SMILEY (precursor dos emojis). Hoxe unímonos a esta celebración, dándolle ó sorriso o seu valor. Non sabemos se o sorriso está dentro das normas de etiqueta...pero estamos seguros de que si debería estar. Un sorriso abre portas, un sorriso transmite bo rollo, e fai que todos nos sintamos mellor, e ademais, como podemos ver no seguinte vídeo é contaxioso, coa peculiaridade de que, segundo estudos científicos tamén traballa de fora cara dentro: se nos forzamos a poñer un sorriso na cara, este fará que nos sintamos mellor aumentando a nosa felicidade.

REFLEXIÓN: o vídeo contaxiouvos o sorriso? Credes no poder do sorriso, tanto cara afora (facendo que os demais estean máis receptivos a nós) como cara dentro (aumentando o noso nivel de felicidade? Podemos probar uns días a sorrir máis, a ver si realmente é verdade, total, tampouco se perde nada, non?
E non podemos pasar sen lembrar tamén que hoxe é o día do "COIDADO DA CASA COMÚN"... sabedes que o coidado da casa común está directamente relacionado co proxecto do cole deste ano? Imos dedicar este proxecto a conmemorar o ano internacional da Sanidade Vexetal (2020)...coma todos os anos, faremos tarefas relacionadas con este tema. E, sabedes que o coidado da casa común tamén está relacionado co lema do curso? Pois cando falamos de ABRIR OS OLLOS ó que nos rodea, temos que ter en conta tamén o estado do noso planeta, e FACELO POSIBLE coidándoo. Seguro que xa vistes polo cole os novos contedores de envases e papel que temos este curso...animámosvos a que o fagades posible comezando polo noso cole!!!!!!
Palabra de Deus: (Romanos 8: 19, 21): "Pois a esperanza viva da creación agarda arelante a revelación dos fillos de Deus. 20Porque a creación está sometida ó fracaso; non pola propia vontade, senón polo poder daquel que a someteu, aínda que coa esperanza 21de que tamén a mesma creación será liberada da escravitude da corrupción e levada á salvación gloriosa dos fillos de Deus".
(Pista: cando di "creación", podemos pensar no planeta)


No hay comentarios:

Publicar un comentario